Expugnaturum se Urbem spem Porsenna habebat, cum C. Mucius, adulescens nobilis, cui indignum videbatur populum Romanum ab Etruscis obsideri, primo sua sponte penetrare in hostium castra constituit; dein metuens ne forte deprehensus a custodibus Romanis retraheretur ut transfuga, senatum adiit. "Transire Tiberim" inquit, "Patres, et intrare castra hostium volo necemque regis promitto".  Adprobant Patres; abdito intra vestem ferro exit. 
 

 Ubi eo venit, in confertissima turba prope regium tribunal constitit. Ibi cum stipendium militibus forte daretur et scriba cum rege sedens pari fere ornatu multa ageret scribam pro rege obtruncat. Apprehensus et ad regem pertractus, "Romanus sum" inquit, "civis; C. Mucium vocant. Hostis hostem occidere volui... Nullam aciem, nullum proelium timueris." Cum rex simul ira infensus periculoque conterritus circumdari ignes minitabundus juberet, "en tibi" inquit, "ut sentias quam vile corpus sit eis qui magnam gloriam vident"; dextramque accenso ad sacrificium foculo injecit. Attonitus miraculo rex amoveri ab altaribus juvenem jussit: "Tu vero abi", inquit, "; nunc te intactum inviolatumque hinc dimitto." Tum Mucius, quasi beneficium remunerans, ait trecentos, sui similes, adversus eum conjuravisse. Qua re ille territus bellum, acceptis obsidibus, deposuit. 
 

 
 Proca, rex Albanorum, duos filios, Numitorem et Amulium habuit. Numitori, qui natu major erat, regnum reliquit; sed Amulius, pulso fratre, regnavit, et ut eum sobole privaret, Rheam Sylviam ejus filiam Vestae sacerdotem fecit, quae tamen Romulum et Remum uno partu edidit. Quo cognito, Amulius ipsam in vincula conjecit, parvulos alveo impositos abjecit in Tiberim, qui tunc forte super ripas erat effusus; sed, relabente flumine, eos aqua in sicco reliquit. Vastae tum in eis locis solitudines erant. Lupa, ut fama traditum est, ad vagitum accurrit, infantes lingua lambit, ubera eorum ori admovit, matremque se gessit. 
 

 Cum lupa saepius ad parvulos reverteretur, Faustulus, pastor regius, rem animadvertit, eos tulit in casam et Accae Laurentiae conjugi dedit educandos. Qui adulti inter pastores primo ludicris certaminibus vires auxerunt, deinde, venando saltus peragrare coeperunt, tum latrones a rapina pecorum arcere. Quare eis insidiati sunt latrones, a quibus Remus captus est. Romulus autem vi se defendit. Tunc Faustulus necessitate compulsus indicavit Romulo quis esset ejus avus, quae mater. Romulus statim armatis pastoribus Albam properavit. 
 

 
 1 - Nuntiatum est Caesari Ariovistum cum suis omnibus copiis ad occupandum Vesontionem, quod est oppidum maximum Sequanorum, contendere. 
 

 2 - Appius Claudius ad Messanam liberandam missus est. Consul primo ad explorandos hostes nave piscatoria trajecit fretum inter Italiam et Siciliam interjectum. Ad quem venerunt nuncii ab Hannone Poenorum duce. 
 

 3 - Eligamus magistros qui vita docent, qui cum dixerunt quid faciendum sit, probant faciendo, qui docent quid vitandum sit.